Dia 10 i 11 di febrüari próksimo lo bai tin e Bolsa di Emigrashon (Emigratiebeurs) na Houten, Hulanda. Einan Fundashon Ban Boneiru Bèk i OCAN lo duna atenshon speshal na REMIGRASHON i oportunidat pa traha na Boneiru, Saba i Statia.

Ademas nos lo duna informashon di Boneiru, Saba i Statia. E bolsa ta habrí riba 10 i 11 di febrüari di 10.00-17.00 or. Tambe lo tin presentashonnan riba e dos dianan ei.

Fundashon Ban Boneiru Bèk i OCAN lo duna un presentashon riba 10 i 11 di febrüari di 14.30 te ku 15.20 or ku oradó invitá Hans Evers. Tur dos presentashon lo tuma lugá den sala 4. Na nan stènt Fundashon Ban Boneiru Bèk i OCAN lo mustra e vakaturanan ku tin aktualmente na Boneiru, Saba i Statia i lo duna informashon di bida na e islanan i rekisitonan pa (r)emigrashon.

Presidente di Fundashon Ban Boneiru Bèk, sra. Celia Fernandes Pedra, ke pa e komunikado aki yega na orea di mas tantu Antiano posibel na Hulanda i p’esei e ta hasi un petishon na tur hende pa avisá nan famia, amigu- i konosínan ku Fundashon Ban Boneiru Bèk huntu ku OCAN lo ta na e Bolsa di Emigrashon na Houten. Por fabor yama òf mail bo yu, ruman òf otro famia- i amigunan i bisa nan ku nan ta mashá bonbiní na nos stènt.  www.emigratiebeurs.nl