Preparashonnan pa Study & Career Event Bonaire ta den ful marcha. E evento aki ta konsistí di e kompetenshanan di Skills riba djaweps 12 i djabièrnè 13 di novèmber i un marshe di informashon riba djasabra 14 di novèmber. Tur aktividat ta tuma lugá rondó òf den oula di SGB na Kaya Odulfinus s/n.

Rosemarijn de Jong ta kordinadó di e Study & Career Event. E ta bisa lo siguiente tokante tema di e evento: “Ku e lema

The Sky Is The Limit

 nos ke inspirá hóbennan pa saka tur lokual nan tin aden; kada un riba su mes nivel i ku su propio ambishonnan. Nos ke inspirá hóbennan pa wak mas aleu ku e kamindanan di kustumber. Nos ta mira ku alumnonan di vmbo ku ta sigui ku mbo kasi outomátikamente ta skohe pa un estudio tradishonal na SGB mes. Nos ke enkurashá nan pa pensa bon ku kua profeshon i estudio nan por desaroyá nan talentonan i despues skohe unda nan por alkansá nan meta mas mihó: sea ta na Boneiru mes òf kisas tin otro opshon ku ta kuadra mihó ku loke nan ke. Hopi di nan no sa tampoko ku un diploma riba nivel 4 di mbo ta duna entrada na un estudio di hbo.”

E ta sigui: “Di otro banda mayoria di alumnonan tabata bai Hulanda pa un estudio di hbo òf universitario. Esaki ta kambiando: universidatnan na Estádos Unídos ta ofresé programanan atraktivo pa studiantenan di Karibe; riba diferente isla Karibense tambe tin bon universidat i un estudio pa maestro di skol básiko bo lo por hasi na Boneiru mes. P’esei nos enfoke ta mas i mas riba nos region, ku ta konsistí di Karibe, Nort Amérika i Amérika Latino.”

Hein van Senten, representante tékniko di Skills Netherlands Caribbean: “Riba djaweps 12 i djabièrnè 13 di novèmber lo tin kompetenshanan di Skills pa studiantenan di (v)mbo. Esakinan ta ligá na e programa di World Skills, kaminda studiantenan vokashonal rònt mundu ta haña chèns di mustra nan abilidatnan. E kompetenshanan aki ta un promé selekshon pa World-Skills-Americas na 2016 na México i Skills-Talents na Hulanda.

Banda di esaki tin un representashon di estudionan vokashonal SENA di Colombia ku lo duna diferente demonstrashon. Tambe pa hendenan ku no ta tuma parti den e kompetenshanan sigur lo ta mashá interesante pa bin mira kiko ta bai tuma lugá.”

Rosemarijn de Jong, kordinadó di e Study & Career Event ta revelá parti di kiko mas lo bai ttin: “Na e marshe informativo di djasabra 14 di novèmber universidatnan di diferente pais lo ta presente. Lo tin presentashonnan ku temanan manera: ‘Posibilidatnan pa estudio den Karibe’ i ‘Kon pa hasi e eskoho korekto pa estudio’. Tambe lo tin hóbennan profeshonal boneriano ku lo konta di nan eksperensianan durante nan periodo di estudio.

Enfin, lo tin sufisiente kos pa mira i eksperensiá: esaki ta un chèns úniko ku e hóben boneriano ta haña pa tin kontakto direkto ku estudionan na Boneiru i den eksterior i tambe tin oportunidat pa kòmbersá ku futuro doñonan di trabou. Nos ta spera di por yama hopi hende bonbiní na e evento importante aki!

Si bo ta un doño di trabou òf un instituto di enseñansa, bo ta kòrdialmente bonbiní pa bin presentá bo mes i duna informashon durante e marshe di informashon. Pa inskribí por fabor tuma kontakto ku Rosemarijn de Jong, kordinadó di Study & Career Event Bonaire 2015. Tel: +599 701 9797; e-mail studyfairbonaire@gmail.com.