kop

"Study & Career Event” ta yuda alumnonan ku eskoho di estudio

 

 

4 di novèmber 2019

 

Durante e evento di Estudio i Karera Boneiru (SCE), eskoho di estudio ta pará sentral.

Lo organisá e marshe di informashon e aña akí riba djaluna 11 di novèmber na Jong Bonaire i e ta spesial pa tur persona ku ke para ketu na nan posibilidatnan den futuro. 

Pues pèrkurá pa bo ta presente!

 

Manera semper e diseño general di e marshe di informashon ta amplio: skolnan pa edukashon di kontinuashon (superior) aki na Boneiru, di otro islanan i tambe doñonan di trabou na Boneiru lo ta presente. Pa menshoná algun ehèmpel: IFE, MTS, University of Curaçao i UDC/CDC di Kòrsou, University of Aruba, i e departamentu di MBO na SGB Boneiru. Banda di esaki, doñonan di trabou na Boneiru lo duna un presentashon di kua ta e oportunidatnan di trabou riba e isla. Tambe lo tin un biaha mas, e ‘plenchi di hospitalidat’ ku ta promové trabou den sektor di turismo i Qredits lo t’ei pa demostrá kon pa buska finansiamentu pa bo propio negoshi.

 

E tema di e aña akí ta ‘Entrepreneurship’. Kiko esaki ta nifiká? Rosemarijn de Jong, kordinadó di e evento, ta duna un splikashon: “Nos ke laga hóbennan pensa kiko ‘entrepreneurship’ ta nifiká pa nan. Ta algu pa bo, pa kuminsá bo propio negoshi despues di bo estudio? Un negoshi grandi òf un negoshi chikitu? Pero tambe bo por ta emprendedor, sin kuminsá un negoshi propio. Ta nifiká ku bo ta kurioso: ku bo ta sali en buska di retonan i ku bo ta haña un solushon pa esakinan.”

 

E evento ta sostené hóbennan di Boneiru den nan eskoho pa un estudio di kontinuashon (superior) òf un profeshon i e ta enfoká riba hóbennan ku ta den e último klasnan di skol sekundario òf edukashon vokashonal intermedio. Durante oranan di mainta lo tin presentashonnan pa diferente klas di SGB. Esaki ta brinda e hóbennan un chèns pa informá nan mes mas mihó tokante e diferente oportunidatnan. Despues di skol, un gran kantidat di e klasnan mas haltu, lo bishitá e marshe di informashon na Jong Bonaire huntu ku nan mèntòr.

 

Pero naturalmente e marshe di informashon no ta solamente pa alumnonan di SGB. Grandi i chikitu ta bon biní pa bin tira un bista. Ke enkurashá prinsipalmente tur mayor di alumnonan di SGB pa nan tambe bini i asina apoyá nan yunan den eskoho di nan estudio. E marshe di informashon riba 11 di novèmber, lo ta habrí pa públiko for di 1.00 or te ku 5.00 or di atardi na Jong Bonaire. Sea bon biní!

 

------------------- 

Informashon pa prensa

Pa mas informashon: Rosemarijn de Jong, kordinadó di ‘Study & Career Event Bonaire 2019’.

Telefòn: +599 701 9797;  Adrès elektróniko: studyfairbonaire@gmail.com