kop

kontakto ku instituto NIBUD

Robby Beukenboom a hasi kontakto ku instituto NIBUD

 

Partido Demokrat ta bastante preokupá pa e oumento di preis bárbaro pa spesialmente artíkulonan di promé nesesidat for di e momentu ku dòler a kuminsá komo medio ofisial di pago na Boneiru. Lider di e partido aki, Robby Beuken­boom, a establesé kontakto ku e instituto hulandes NIBUD, ku ta atendé e tipo di situashonnan aki, pa wak kua ta e po­sibilidatnan pa eventualmente huntu ku CBS hasi e inves­tigashonnan nesesario riba e tereno aki.

Den un kombersashon ku Robby Beukenboom tabatin ku Minister Donner, el a pidi e mandatario pa hasi tur posibel pa asina laga NIBUD, un instituto na Hulanda ku ta enkargá ku investigashonnan enkuanto di forsa di kompra, hasi investigashonnan seme­hante na Boneiru.

Tur habitante di Boneiru for di komienso di yanüari ta eksperenshá subida di preis na un manera bárbaro, spesial riba komestibel i riba dunamentu di servisio. Tur preis a kambia di florin bai dòler i ta hopi ta esnan ku awor ta kana ku papel i pèn pa konta nan komestibelnan promé ku nan yega kaha pa paga.

Den kurso di siman pasá NIBUD mes a laga un repre­sentante tuma kontakto ku

Beukenboom i a informá ku enbèrdat ta nan ta e instituto yamá pa yuda riba e terenonan aki. Na Hulanda nan ta hasi investigashon spesial pa mas di shen grupo spesífiko den kada komunidat, manera pa gruponan di 60 plùs, gruponan ku un hèndikèp, amanan di kas, hóbennan, penshonadonan, etc.

Nan ta bini ku reko­mendashonnan spesial i ta wak kon por yuda kada grupo na un manera ku nan por lora i sobreviví ku nan salario. NIBUD a informá ku manera nan haña e petishon aki di Ministerio na Den Haag, nan lo por kuminsá mesora ku e trámitenan nesesario pa mira kon por kontrolá e situashon ku a surgi despues di in­trodukshon di dòler.

Beukenboom a bisa ku si Gobièrnu di Hulanda no ke òf por duna enkargo na NIBUD pa hasi un investigashon asina, Gobièrnu di Boneiru tambe ta den posishon pa hasi esaki.