Kua medida i fasilidatnan ta nesesario pa mas studiante di islanan di Antias Hulandes anterior por finalisá nan estudio den eksterior ku éksito. Esaki tabata e pregunta sentral di e konferensha "Estudio den eksterior", kua a tuma lugá dianan 29 i 30 di sèptèmber na Boneiru. Partisipantenan, ademas di e konseheronan di estudio, a inklui representantenan di DUO (Dienst Uitvoering Onderwijs), Studiefinanciering i vários instansha, relashoná ku preparashon i guia di studiantenan ken ta kontinuá nan estudio pafó di nan mes isla. (Fundashon Ban Boneiru Bèk)

Bou guia di moderador Inge Berben, direktor di Fundashon FORMA pa edukashon i kursonan pa adulto, a interkambiá konosementu i eksperensha i konhuntamente a yega na un pakete di medida pa mehorashon di e siguiente aspektonan en konekshon ku estudionan den eksterior:

• Preparashon di futuro studiantenan riba nan mes isla;
• Guia di studiantenan na momento di yegada i du­rante di nan estudio na Hulanda i den region;
• Desaroyo di un data­base sentral ku informashon tokante institutonan rekonosé den region.

Pa medio di presentashonnan, representantenan di Kôrsou, Aruba, Sint Maarten i e islanan di Hulanda Karibense, a splika kon nan ta atendé ku preparashon di studiantenan saliendo i guia di studiantenan den eksterior.

E presentashonnan a demonstrá ku e islanan ta aserká e asuntu aki di nan mes manera i ku tin mester di un aserkamentu integral, kombinando mihó práktika i eksperensha di e diferente islanan.

A konkluí ku tin nesesidat pa krea un plataforma sentral "Estudio den Eksterior", ku partisipantenan di kada isla. Meta di e plataforma aki to ta pa identifiká, inisia i kordiná akshonnan, pa yega na un modelo pa tin programa sentral pa preparashon i guia. Despues di esei kada isla to por hasi nan mes eskoho pa kompilashon di e programanan di preparashon i guia.

E plataforma to reuni promé ku fin di ariapa determiná i inisia akshonnan pa realisá e metanan aki. Departamentu Edukashon, Kultura i Siensia, dentro di Rijksdienst Caribisch Nederland (RCN), ken tambe a tuma inisiativa pa e konferensha aki, lo organisá e promé reunion di e plataforma aki.

Eksperenshanan di e islanan ta demostrá ku studiantenan den region en general ta kaba nan estudio ku mas eksito. Tambe nan tin menos problema di adaptashon, of ku kultura i idioma, kua hopi bia ta forma un barera pa finalisá un estudio ku eksito.

Un inventarisashon di institutonan di edukashon den region a demostrá ku tin un oferta amplio di estudionan rekonos den re­gion, kua ta brinda loke e islanan mester. Tambe a bira kla ku tin posibilidatnan pa yega na koperashon ku sierto institutonan relativamente karu, kua por resultá den un nivel di kontribushonnan kua por kubri kasi kompletamente dor di e bekanan.

Finalmente Fundashon Studiekeuze 123, distribuidó independiente di informashon pa eskoho di estudio dentro di Hulanda Europeo, pa medio di nan website studiekeuzeinformatie.nl , en­tre otro a presenta e idea pa ekspandé e database aktual, konteniendo institutonan Hulandes ku informashon tokante e oferta di estudio den region Karibense.

E manera den kua to mester inklui e informashon aki den e database i distrihuI e informashon pa medio di websitenan die islanan, to ta un di e tópikonan ku lo diskutí den e plataforma "Estudio den eksterior".

Extra - Djaweps 2 oktober 2014