“For di febrüari e aña aki mi ta sigui un periodo di práktika na Water- en Energiebedrijf Bonaire (WEB), i ta bai bon,” e hóben ingeniero di mekánika (werktuigbouwkundige) Christopher (Chris) Pourier ta konta. E boneriano di 24 aña a haña su Bachelor of Science na Universidat Tékniko di Delft i despues a buska trabou na su mes isla. “No a bai mesora. No tin asina tantu trabou pa ingeniero na Boneiru. Pa un tempu kòrtiku mi a hasi un trabou chikitu via uitzendbureau pa Telbo, pero e periodo di práktika akí a bin na e momentu ideal.”

Christopher ta Boneiru su promé trainee ofisial. WEB ta kana dilanti na Boneiru pa loke ta trata e funshon (di siña) pagá akí. Christopher: “Ta solamente ora bo kuminsá traha, bo ta haña eksperensia práktiko i bo ta siña kon funshoná den un kompania. Asina mi ta siña tur dia hopi kos nobo.”

Chris a nase i lanta na Boneiru. Despues di haña su diploma di VWO, el a bai studia na Hulanda. El a gusta su estudio i tambe Hulanda, spesialmente pasobra e por a biaha hopi. Chris: “Mi gusta biaha i a hasi bon uso di e buelonan barata for di Hulanda pa deskubrí e otro paisnan na Oropa.” Asina el a studia mei aña na Stockholm, Suesia na Royal Institute of Technology i siña papia sueko aya tambe. Tòg e tabatin gana di regresá kas na Boneiru– serka famia i amigu – duna su aporte na desaroyo duradero di e isla.

Segun Chris, mas studiante tin gana di regresá Boneiru pa traha i biba, pero hopi bia ta resultá difísil pa haña trabou. No ta reakshoná riba solisitashon loke ta demotivá, e trainee ta konta, òf no tin sufisiente lugá di trabou disponibel. Chris ta splika: “Nan ta bisa ku studiantenan no ke regresá, pero no ta asina. Lo tin ku invertí mas den programanan di trainee. Komo kompania bo ta invertí den e futuro trahadó i komo trainee bo ta haña hopi eksperensia di trabou.”

Christopher ta traha hopi huntu ku e konsehero di kompania di WEB, Roy Silberie. Banda di un dósis grandi di eksperensia práktiko, manera opservashon di trabou di mantenshon na e djènereiternan na e parke solar na Barcadera, e ta hasiendo tambe algun investigashon chikitu. Uso di koriente lokal di e diferente barionan na Boneiru, por ehèmpel. Chris: “Hinkando sinku mion dato di 2010 te ku awor den kòmpiuter, mi por analisá den kua bario a usa mas – òf ménos – koriente. Asina un hende na Sabadeco ta usa muchu mas koriente ku un hende na Antriòl.” Tambe el a hasi un análisis di uso partikular di pènel solar na Boneiru. Dos siman pasá, Chris a presentá su resultadonan na empleadonan di WEB. E ingeniero dinámiko akí ta spera di haña un posishon fiho den e kompania. “Tin un esfera kolegial agradabel i habrí,” Chris ta bisa, “i ta un kompania profeshonal dushi pa traha p’e. Tambe mi lo ke kontribuí na koriente i awa pagabel pa hendenan di Boneiru.”

Bron Boneiru Awe