Karakterístikanan

Eskudo di Boneiru tin un eskudo den koló blou ku un timon koló di oro (hel).

E eskudo chikitu parti mei mei tin koló di plata (blanku) ku un strea koló kòrá ku rònt di dje un renchi di kompas koló pretu.

Un korona di oro ku sinku blachi ta kubri e eskudo.

For di: Hoge Raad van Adel – Konseho Supremo di Noblesa, relato anual 2010

BONEIRU

Pa medio di Lei di 17 di mei 2010 (Stb. 345) teritorio insular Boneiru a bira entidat públiko den Reino Hulandes. Dia 20 di yüli Kolegio Ehekutivo a supliká pèrmit di teritorio insular pa por karga eskudo di teritorio insular komo eskudo di munisipio spesial Boneiru.

Pa medio di Desishon Insular di 26 di yüni 1986, nr. 9 (A.B. 1986, nr. 13) a stipulá e eskudo aki i den e Desishon Insular ei a deskribié komo lo siguiente: Un escudo di koló blou: 1. riba esei un timon di oro; 2. riba esei un eskudo chikitu di plata, un strea di 6 punta koló kòrá, ku rònt di dje un renchi di kompas pretu; 3. kubrí ku un korona di oro ku sinku blachi.

Den su konseho di 31 di ougùstùs 2010 Konseho Supremo a bai di akuerdo ku e eskudo aki. Sinembargo el a konsehá pa mantené e blasonashon heráldiko usual i laga e kantidat di punta (6) di e strea keda afó, pasobra ta trata aki di un strea komun. Pa e mésun motibu tampoko no ta menshoná e ocho spaknan di e timon.

Pa medio di Dekreto Real di 20 di sèptèmber 2010, nr. 10.002198, a ratifi ká e siguiente eskudo pa e entidat públiko Boneiru nobo: den blou un timon di oro; den un eskudo chikitu di plata un strea kòrá, ku un renchi di kompas pretu rònt di dje.

E eskudo ta kubrí ku un korona di oro ku sinku blachi.

Simbolismo

E eskudo blou ta referí na shelu i laman, ku ta konektá Boneiru ku mundu i ta hunga un ròl importante den nos ekonomia.

E timon di oro ta representá e bonerianonan ku a nabegá riba lamannan rònt mundu i ku for di hopi tempu kaba tur hende ta konsiderá nan komo e mihó nabegantenan i trahadónan di boto di nos region.

E strea kòrá ta simbolisá e sanger ku bonerianonan a drama pa liberá nan mes di enemigu. E puntanan di e strea ta referí na e seis barionan tradishonal riba nos isla: Rincon, Nort’i Saliña, Antriol, Nikiboko, Tera Kòrá i Playa.

E renchi di kompas pretu ta para pa determinashon di rumbo i nos relashonnan ekonómiko, amistoso i kultural den tur parti di mundu.

E korona di oro ta muestra di e laso entre Boneiru i Reino Hulandes.

Heráldika

E kolónan di eskudo di Boneiru ta e asina yamá kolónan heráldiko: e metalnan oro (hel) i plata (blanku); i e kolónan blou, kòrá i pretu.

Heráldika ta e siensia di eskudo: identifi kadó di persona, famia òf organisashon.

Nan a surgi den Edat Media oropeo i nan ta derivá di ekipo di e kabayeronan.

E eskudo ta e parti mas importante di e total. Riba dje hopi biaha bo ta mira un hèlm òf un korona. Komo isla ku ta pertenesé na Reino Hulandes, Boneiru tin e derecho pa usa korona di markes den su eskudo.

Un dekreto real ta otorgá eskudo di entidatnan di derecho públiko. Konseho Supremo di Noblesa ta guia e prosedura di otorgamentu di eskudo i ta sòru pa e eskudonan kuadra heráldikamente.

Na luna di sèptèmber 1986 Konseho Supremo di Noblesa a aprobá eskudo di Boneiru. Despues di abolishon di Antia Hulandes pa medio di un dekreto real di 20 di sèptèmber 2010 (nr. 10.002198) a otorgá e eskudo na Boneiru komo

entidat públiko di Hulanda.

Historia

Dia 26 di yüni 1986 Konseho Insular a stipulá eskudo di Boneiru.

Hopi trabou a tuma lugá promé ku a yega asina leu.

A nombra un komishon pa hasi proposishon pa un eskudo típiko boneriano.

E komishon a bini ku tres proposishon pa diseño di e eskudo: nos fl amingu, pasobra Boneiru ta konosí komo isla di fl amingu; un strea ku sinku punta, símbolo di e sinku islanan di e anterior Antia Hulandes; i e kadushi largu ku nan ta usa pa e manera karakterístiko di sera kurá na Boneiru.

Pero e eskudo mester a kumpli ku e stipulashonnan di heráldika i Konseho Supremo di Noblesa mester a aprob’é. Wes mr. P.C. Briët, ku den e tempu ei tabata traha na Antia Hulandes i tabata un eksperto riba tereno di heráldika, a yuda adaptá e eskudo na e eksigensianan.

Esei a kondusí na un eskudo ku e korona di oro riba e eskudo ku e kolónan blou i plata, ku e timon di oro, e strea kòrá i e renchi di kompas pretu.

Dia 6 di sèptèmber 1986 ofi sialmente a desvelá eskudo di Boneiru den presensia di un kantidat grandi di miembro di Parlamentu i promé minister di Antia Hulandes, Don Martina. Den su diskurso e gezaghebber di e tempu ei George Soliana a bisa ku e eskudo ta un refl eho di e karakter boneriano, kaminda e boneriano ta inmediatamente rekonosibel den kada símbolo. ‘Un hende balioso ku despues di un lucha duru sa di alkansá su meta.’