Despues di e promé presentashonnan digital eksitoso di Study Choice Caribbean na novèmber 2020, e di dos parti lo tuma lugá dia 8 i 10 di mart 2021. A desaroyá un plataforma digital di kua alumnonan di tur e seis islanan di Karibe Hulandes por hasi uso. E alumnonan por presensiá un òf mas presentashon di nan interes i hasi pregunta. E biaha aki e presentashonnan lo enfoká riba alumno- i studiantenan ku kier hasi òf kontinuá un estudio profeshonal intermedio.
Ademas di institunan di enseñansa lo tin institutonan manera Brandweer, Kustwacht i Hospital di diferente isla ku lo presentá nan mes na e futuro studiantenan i splika òf mustra kiko e estudionan i/o e profeshon ta enserá. Bibu i direkto lo kontestá preguntanan manera: kua nivel di preparashon bo mester pa bo por sigui e estudio di bo eskoho; kon bo por inskribí i kualke pregunta ku abo komo alumno por tin. No pèrdè e oportunidat úniko aki di studia riba bo mes isla òf den region. Tur presentashon ta keda riba e website, ke men ku bo por wak nan despues, si pa un òf otro motibu bo a pèrdè nan.
Inskripshon pa e website aki ta grátis, tantu pa presentadó komo alumno.
Bai na e website https://studychoicecaribbean.com/register/ i inskribí na tempu.