E aña aki lo organisá e di dies Marshe di Estudio i Profeshon na Boneiru riba djabièrnè 15 di novèmber, manera ta kustumber despues di e Marshe di Estudio i Profeshon na Kòrsou. Fundashon Ban Boneiru Bèk a bolbe haña enkargo di Komunidat di Skol Boneriano pa organisá e marshe akí. Debí na e echo ku e aña akí lo organisá e di dies Marshe di Estudio i Profeshon, nos ke hasi e dia akí unu festivo i spesial.
E Marshe di Estudio i Profeshon lo tuma lugá den salanan di Jong Bonaire na Kaya Simon Bolivar. Partisipantenan por kuminsá drecha nan stènt for di 8 or di mainta. Apertura ofisial lo ta 11.00 or i e marshe lo ta habrí pa públiko di 11.30 – 18.00 or.
Meskos ku tur aña komishon di marshe a skohe un lema pa yuda i stimulá hóbennan, futuro di Boneiru, pa nan informá na mes debidamente tokante posibilidatnan ku tin riba merkado laboral i di estudio, pa nan por hasi un eskoho bon prepará. P’esei e lema di e aña akí ta:
Ta di sumo importansia pa duna hóbennan un bon bista riba posibilidatnan di estudio i profeshon, pasobra un hóben bon informá por hasi un mihó eskoho pa su futuro. Nos ta spera un kantidat grandi di partisipante e aña akí i nos ta enkurashá studiantenan/ hóbennan pa bin orientá i buska informashon tokante posibilidatnan ku tin riba merkado laboral i di estudio.
Marshe di Estudio i Profeshon 2012 tabata un éksito. Un kantidat grandi di 38 institutonan di MBO i HBO i kompanianan di Aruba, Boneiru, Kòrsou, i Hulanda a partisipá.
BON FM a entrevistá partisipantenan I bishitantenan I a transmití esaki bibu i direkto di 3 or– 4or di atardi. A distribuí bou di bishitantenan e di sinku edishon di e korant di marshe. Flamingo Communincations lo imprimí e korant di marshe e aña akí atrobe, un korant konsistiendo di artíkulonan interesante i entrevistanan. Pa publiká un propaganda den e korant por meil e petishon na: sbmbonaire@gmail.com.
Durante di marshe di 2012 a tene un enkuesta bou di e bishitantenan. Resultado di e enkuesta ta indiká ku bishitantenan a skohe e siguiente stèntnan komo e kuater mihónan. Nan ta respektivamente:
1. Fundashon Mariadal
2. Colegio EPI
3. Universiteit van Aruba
4. Universiteit van de Nederlandse Antillen
Si bo ta deseá di lesa mas di e resultado di e enkuesta, por haña esaki den e relato di 2012, ku ta riba e wèpsait di Fundashon Ban Boneiru Bèk.
Tur partisipante di marshe 2012 a haña un karta di informashon i un formulario di inskripshon pa e marshe di e aña aki via faks i/òf meil. Si tin kompania òf instituto edukashonal ku ke partisipá, pero nan no a haña un formulario di inskripshon ainda, por fabor manda un meil na sbmbonaire@gmail.com pa por inskribí. Komishon di Marshe 2013 ta pidi kada unu ku ke partisipá pa inskribí promé ku dia 15 di yüli awor. Por haña mas informashon riba wèpsait di Fundashon Ban Boneiru Bèk, www.banboneirubek.com.
Persona di kontakto pa Marshe di Estudio i Profeshon 2013 ta:
señora Lilian Paula-Crestian, e-mailadres: sbmbonaire@gmail.com
Fundashon Ban Boneiru Bèk, www.banboneirubek.com
Saludo kòrdial,
Sra. Lilian Paula-Crestian
Presidente Komishon Marshe di Estudio i Profeshon 2013