Mayoria empleado nobo di RCN ta Antiano.

[Webmaster]

 

 

 

 

 

Rijksdienst Caribisch Nederland (RCN) durante e último tres lunanan aki a tuma 41 persona na trabou. Di e 41 koleganan nobo tin 38 Antiano, esaki ta 93%, di kua seis di e personanan ta remigrá for di Hulanda pa sea Boneiru, Saba òf Sint-Eustatius. 22 vakatura a keda yená dor di Boneriano, for di Kòrsou a bini sinku persona, di Hulanda tres,  for di Sint-Eustatius dos, for di Aruba a bini tambe dos i for di Saba un persona a haña trabou na RCN.  

 

RCN ta hopi kontentu ku e resultado aki. No solamente a logra yena gran parti di e vakaturanan, pero tambe a duna kontenido na e maneho di RCN pa loke ta trata tumamentu di personal na trabou. Esta ku mas tantu posibel ta purba yena esakinan ku personanan ku ta Antiano, di desendensia Antiano òf ku tin un laso direkto i estrecho ku e islanan ku awor ta forma Antia.

 

RCN ta haña importante ku gobièrnu di Reino riba Boneiru, Sint-Eustatius i Saba ta un refleho di e komunidat lokal.

E resultadonan ta demostrá ku bou di Antianonan ku ta buska trabou tin hopi profeshonal ku vários kapasidat di un profil spesífiko te ku preparashon haltu.

 

Den e último tres lunanan aki Rijksdienst Caribisch Nederland a publiká 41 vakatura di kua algun tabata pa mas ku un persona. E prosedura di solisitut na Polis i na Kas di Detenshon ainda no ta kompletamente kla kontrali na e otro departamentunan ku entretantu si a finalisá e proseso aki.

 

En total  415 kandidato a reakshoná riba e avisonan ku a keda publiká. Algun di e kandidatonan aki a solisitá riba mas ku un funshon. E situashon aktual ta ku 41 kolega nobo ta den servisio. Algun di nan ya a kuminsá traha i otronan mester muda for di e otro islanan òf Hulanda pa asina kuminsá nan trabou nobo.

 

RCN ke ta pa i di Boneiru Saba i Sint-Eustatius. Un kuerpo di personal bon balansá ta esensial pa asina Antiano i Hulandesnan por traha huntu riba futuro di Karibe Hulandes.

[Auteur]

Berichten